sairab ho kabhi ye KHilaf-e-qayas hai

sairāb ho kabhī ye ḳhilāf-e-qayās hai

apnī nazar ko pyaas to sahrā kī pyaas hai

is meñ hai saarī husn-o-mohabbat se dilkashī

ye ziist varna maut hī kā iqtibās hai

ye dekhne kī shai nahīñ mahsūs kar ise

har phuul ke badan pe hayā kā libās hai

mātam-kunāñ hai shiddat-e-tūfāñ kī mauj mauj

kashtī mirī Dubo ke samundar udaas hai

yuuñ lamha lamha chhalke mirā jām-e-zindagī

bachche ke haath jaise labālab gilās hai

har aadmī banātā hai qismat ke zā.iche

har aadmī yahāñ to sitāra-shanās hai

ash.ār kyoñ na mere hoñ ḳhushbū kī khetiyāñ

ai 'jān' ḳhāk-e-pāk jo fan kī asaas hai

sairab ho kabhi ye KHilaf-e-qayas hai

apni nazar ko pyas to sahra ki pyas hai

is mein hai sari husn-o-mohabbat se dilkashi

ye zist warna maut hi ka iqtibas hai

ye dekhne ki shai nahin mahsus kar ise

har phul ke badan pe haya ka libas hai

matam-kunan hai shiddat-e-tufan ki mauj mauj

kashti meri Dubo ke samundar udas hai

yun lamha lamha chhalke mera jam-e-zindagi

bachche ke hath jaise labaalab gilas hai

har aadmi banata hai qismat ke zaiche

har aadmi yahan to sitara-shanas hai

ashaar kyon na mere hon KHushbu ki khetiyan

ai 'jaan' KHak-e-pak jo fan ki asas hai