sajda-e-yaad mein sar apna jhukaya hua hai

sajda-e-yād meñ sar apnā jhukāyā huā hai

ham ne ushshāq ke rutbe ko baḌhāyā huā hai

tohmateñ hoñ yā ki patthar hoñ muqaddar us kā

ek dīvāna tire shahr meñ aayā huā hai

merā maqsad thā faqat ḳhaak uḌānā sāhab

is liye dasht ko ghar-bār banāyā huā hai

shaukat-e-majlis-e-hijrāñ ko baḌhānā thā so yaar

maiñ ne palkoñ pe tirā hijr sajāyā huā hai

ik parī-zād hai dhaḌkan ke ilāqe meñ muqīm

jis ne māhaul ko pur-vajd banāyā huā hai

paañv meñ Daal ke tujh naam ke ghuñgrū ham ne

apne andar hī miyāñ raqs rachāyā huā hai

yaar kī sohbat-e-pur-faiz kī barkat ne 'sa.īd'

is zamāne meñ mirā kaam chalāyā huā hai

sajda-e-yaad mein sar apna jhukaya hua hai

hum ne ushshaq ke rutbe ko baDhaya hua hai

tohmaten hon ya ki patthar hon muqaddar us ka

ek diwana tere shahr mein aaya hua hai

mera maqsad tha faqat KHak uDana sahab

is liye dasht ko ghar-bar banaya hua hai

shaukat-e-majlis-e-hijran ko baDhana tha so yar

main ne palkon pe tera hijr sajaya hua hai

ek pari-zad hai dhaDkan ke ilaqe mein muqim

jis ne mahaul ko pur-wajd banaya hua hai

panw mein Dal ke tujh nam ke ghungru hum ne

apne andar hi miyan raqs rachaya hua hai

yar ki sohbat-e-pur-faiz ki barkat ne 'said'

is zamane mein mera kaam chalaya hua hai