سجے ہیں دار صلیبوں پہ سر نہیں آیا

سجے ہیں دار صلیبوں پہ سر نہیں آیا

کسی کی روح میں اب تک بھنور نہیں آیا

پڑھا تھا ظلم کی حد پر ہے انقلاب کہیں

ہماری راکھ میں اب تک شرر نہیں آیا

بہت کٹھن تھا سفر پاؤں گھس گئے میرے

ہوئی ہے شام مگر میرا گھر نہیں آیا

پھنسا ہے قافلہ اب بھیڑیوں کے نرغے میں

ہے انتظار پر اب تک قمر نہیں آیا

جھکے ہوؤں کو یہاں خلعتیں صلے میں ملیں

میں چاہتا تھا مگر یہ ہنر نہیں آیا

صدا لگائی ہے پر بند ہیں دریچے سبھی

صدا میں میری ابھی وہ اثر نہیں آیا

ریاضتوں میں کمی رہ گئی کہیں شاہدؔ

حیات ختم ہے لیکن ثمر نہیں آیا