saje hain dar salibon pe sar nahin aaya

saje haiñ daar salīboñ pe sar nahīñ aayā

kisī kī ruuh meñ ab tak bhañvar nahīñ aayā

paḌhā thā zulm kī had par hai inqalāb kahīñ

hamārī raakh meñ ab tak sharar nahīñ aayā

bahut kaThin thā safar paañv ghis ga.e mere

huī hai shaam magar merā ghar nahīñ aayā

phañsā hai qāfila ab bheḌiyoñ ke narġhe meñ

hai intizār par ab tak qamar nahīñ aayā

jhuke huoñ ko yahāñ ḳhil’ateñ sile meñ mileñ

maiñ chāhtā thā magar ye hunar nahīñ aayā

sadā lagā.ī hai par band haiñ darīche sabhī

sadā meñ merī abhī vo asar nahīñ aayā

riyāzatoñ meñ kamī rah ga.ī kahīñ 'shāhid'

hayāt ḳhatm hai lekin samar nahīñ aayā

saje hain dar salibon pe sar nahin aaya

kisi ki ruh mein ab tak bhanwar nahin aaya

paDha tha zulm ki had par hai inqalab kahin

hamari rakh mein ab tak sharar nahin aaya

bahut kaThin tha safar panw ghis gae mere

hui hai sham magar mera ghar nahin aaya

phansa hai qafila ab bheDiyon ke narghe mein

hai intizar par ab tak qamar nahin aaya

jhuke huon ko yahan KHil’aten sile mein milen

main chahta tha magar ye hunar nahin aaya

sada lagai hai par band hain dariche sabhi

sada mein meri abhi wo asar nahin aaya

riyazaton mein kami rah gai kahin 'shahid'

hayat KHatm hai lekin samar nahin aaya