saKHt mushkil hua ab sahab-e-iman hona

saḳht mushkil huā ab sāhab-e-īmāñ honā

nahīñ is daur meñ āsān musalmāñ honā

har qadam par hai yahāñ rāhzanoñ kā ḳhatra

ham to bebas haiñ ḳhudāyā tū nigahbāñ honā

ḳhatm hotā hī nahīñ silsila-e-ranj-o-alam

mushkiloñ ne mirī sīkhā nahīñ āsāñ honā

barkateñ rizq kī baḌh jaatī haiñ us ke dam se

bā.is-e-ḳhair hai ghar meñ koī mehmāñ honā

dil meñ ho jaatā hai tūfān-e-qayāmat barpā

dosh-e-mahbūb pe zulfoñ kā pareshāñ honā

kaash kah deñ vo mohabbat bhare andāz meñ phir

mere 'ahsan' zarā ik baar ġhazal-ḳhvāñ honā

saKHt mushkil hua ab sahab-e-iman hona

nahin is daur mein aasan musalman hona

har qadam par hai yahan rahzanon ka KHatra

hum to bebas hain KHudaya tu nigahban hona

KHatm hota hi nahin silsila-e-ranj-o-alam

mushkilon ne meri sikha nahin aasan hona

barkaten rizq ki baDh jati hain us ke dam se

bais-e-KHair hai ghar mein koi mehman hona

dil mein ho jata hai tufan-e-qayamat barpa

dosh-e-mahbub pe zulfon ka pareshan hona

kash kah den wo mohabbat bhare andaz mein phir

mere 'ahsan' zara ek bar ghazal-KHwan hona