saKHt na-hamwar o mushkil tha magar aisa na tha

saḳht nā-hamvār o mushkil thā magar aisā na thā

maiñ ne jab rāheñ tarāshī thiiñ safar aisā na thā

kis zamāne kā havāla de rahe ho dosto

aaj se pahle to jiine kā hunar aisā na thā

shāmil-e-hālāt agar hotīñ na kuchh ḳhush-fahmiyāñ

merī qismat meñ bhaTaknā dar-ba-dar aisā na thā

mujh se kyoñ mansūb ho baiThīñ vafā kī ne.amateñ

maiñ to apne vāste bhī mo'atabar aisā na thā

maiñ kahāñ aisā ki jhuTlā.ūñ tumheñ lekin ye hai

maiñ ne jab dekhā jahāñ dekhā bashar aisā na thā

aaj tak bainassutūr uljhī huī tahrīr huuñ

maiñ ki patthar thā magar patthar-nazar aisā na thā

maiñ ne kis buute pe dī 'hairat' sadā tūfān ko

mere ḳhvāboñ kā shabistāñ merā ghar aisā na thā

saKHt na-hamwar o mushkil tha magar aisa na tha

main ne jab rahen tarashi thin safar aisa na tha

kis zamane ka hawala de rahe ho dosto

aaj se pahle to jine ka hunar aisa na tha

shamil-e-haalat agar hotin na kuchh KHush-fahmiyan

meri qismat mein bhaTakna dar-ba-dar aisa na tha

mujh se kyon mansub ho baiThin wafa ki neamaten

main to apne waste bhi mo'atabar aisa na tha

main kahan aisa ki jhuTlaun tumhein lekin ye hai

main ne jab dekha jahan dekha bashar aisa na tha

aaj tak bainassutur uljhi hui tahrir hun

main ki patthar tha magar patthar-nazar aisa na tha

main ne kis bute pe di 'hairat' sada tufan ko

mere KHwabon ka shabistan mera ghar aisa na tha