saKHt wahshi hun bila-wajh biphar jata hun

saḳht vahshī huuñ bilā-vaj.h biphar jaatā huuñ

is liye apnī taraf jā.ūñ to Dar jaatā huuñ

ek hī tarz kī vahshat se bhare rahte haiñ

maiñ agar dasht nahīñ jaatā to ghar jaatā huuñ

chaar chhe inch kī duurī se mirā saayā mujhe

ik sadā detā hai maiñ bār-e-digar jaatā huuñ

ba.az auqāt udāsī ko manāne ke liye

apne hone kī dalīloñ se mukar jaatā huuñ

lafz bunte hue aatā huuñ saḌak par aur phir

jaane kyā dhyān meñ aatā hai Thahar jaatā huuñ

ghar se daftar gayā daftar se ghar aayā ab dasht

vaise bantā to nahīñ jaanā magar jaatā huuñ

saKHt wahshi hun bila-wajh biphar jata hun

is liye apni taraf jaun to Dar jata hun

ek hi tarz ki wahshat se bhare rahte hain

main agar dasht nahin jata to ghar jata hun

chaar chhe inch ki duri se mera saya mujhe

ek sada deta hai main bar-e-digar jata hun

baz auqat udasi ko manane ke liye

apne hone ki dalilon se mukar jata hun

lafz bunte hue aata hun saDak par aur phir

jaane kya dhyan mein aata hai Thahar jata hun

ghar se daftar gaya daftar se ghar aaya ab dasht

waise banta to nahin jaana magar jata hun