salat-o-saum gae sab ibaadaten bhi gain

salāt-o-saum ga.e sab ibādateñ bhī ga.iiñ

tumhāre baad mirī sab riyāzateñ bhī ga.iiñ

vo jashn-e-dīd vo mahkī huī hasīñ shāmeñ

jo saath ham ne guzārīñ vo sā.ateñ bhī ga.iiñ

na terī zulf kī ḳhushbū na vo tabassum hai

jo tū ne kī thiiñ kabhī vo ri.āyateñ bhī ga.iiñ

vo rang-o-bū vo surūr-e-mahāfil-e-yārāñ

vo qurbateñ bhī ga.iiñ vo ināyateñ bhī ga.iiñ

vo terī shoḳh hañsī khil-khilāte vo lahje

ḳhayāl-o-ḳhvāb hue to samā.ateñ bhī ga.iiñ

na ratjage haiñ vo 'shāhid' na ab vo bazm-e-suḳhan

vo sher sunñe sunāne kī ādateñ bhī ga.iiñ

salat-o-saum gae sab ibaadaten bhi gain

tumhaare baad meri sab riyazaten bhi gain

wo jashn-e-did wo mahki hui hasin shamen

jo sath hum ne guzarin wo saaten bhi gain

na teri zulf ki KHushbu na wo tabassum hai

jo tu ne ki thin kabhi wo riayaten bhi gain

wo rang-o-bu wo surur-e-mahafil-e-yaran

wo qurbaten bhi gain wo inayaten bhi gain

wo teri shoKH hansi khil-khilate wo lahje

KHayal-o-KHwab hue to samaaten bhi gain

na ratjage hain wo 'shahid' na ab wo bazm-e-suKHan

wo sher sunne sunane ki aadaten bhi gain