صلوٰۃ و صوم گئے سب عبادتیں بھی گئیں

صلوٰۃ و صوم گئے سب عبادتیں بھی گئیں

تمہارے بعد مری سب ریاضتیں بھی گئیں

وہ جشن دید وہ مہکی ہوئی حسیں شامیں

جو ساتھ ہم نے گزاریں وہ ساعتیں بھی گئیں

نہ تیری زلف کی خوشبو نہ وہ تبسم ہے

جو تو نے کی تھیں کبھی وہ رعایتیں بھی گئیں

وہ رنگ و بو وہ سرور محافل یاراں

وہ قربتیں بھی گئیں وہ عنایتیں بھی گئیں

وہ تیری شوخ ہنسی کھل کھلاتے وہ لہجے

خیال و خواب ہوئے تو سماعتیں بھی گئیں

نہ رت جگے ہیں وہ شاہدؔ نہ اب وہ بزم سخن

وہ شعر سننے سنانے کی عادتیں بھی گئیں