salib-e-dard pe wara gaya tha kyun mujhko

salīb-e-dard pe vaarā gayā thā kyuuñ mujh ko

ġham-e-firāq se maarā gayā thā kyuuñ mujh ko

kisī ḳhayāl kisī ḳhvāb ke jazīre par

tamām umr guzārā gayā thā kyuuñ mujh ko

palaT rahā thā dar-e-ḳhvāb se jo ḳhālī haath

to baar baar pukārā gayā thā kyuuñ mujh ko

kaf-e-gumāñ se jo girnā thā umr bhar ke liye

to ek pal ko sarāhā gayā thā kyuuñ mujh ko

agar nahīñ thā yahāñ koī muntazir merā

to phir falak se utārā gayā thā kyuuñ mujh ko

kisī ne merī taraf dekhnā na thā 'ḳhurshīd'

to be-sabab hī sañvārā gayā thā kyuuñ mujh ko

salib-e-dard pe wara gaya tha kyun mujh ko

gham-e-firaq se mara gaya tha kyun mujh ko

kisi KHayal kisi KHwab ke jazire par

tamam umr guzara gaya tha kyun mujh ko

palaT raha tha dar-e-KHwab se jo KHali hath

to bar bar pukara gaya tha kyun mujh ko

kaf-e-guman se jo girna tha umr bhar ke liye

to ek pal ko saraha gaya tha kyun mujh ko

agar nahin tha yahan koi muntazir mera

to phir falak se utara gaya tha kyun mujh ko

kisi ne meri taraf dekhna na tha 'KHurshid'

to be-sabab hi sanwara gaya tha kyun mujh ko