samajh ke sare sahaaron ko raegan humne

samajh ke saare sahāroñ ko rā.egāñ ham ne

utaar pheñkā hai kashtī kā bādbāñ ham ne

ye kam subūt hai mahshar meñ be-gunāhī kā

ki apne hoñToñ pe pherī nahīñ zabāñ ham ne

jo baat chheḌī hai ham ne hameñ bhī 'ilm nahīñ

ki ḳhatm karnā hai is baat ko kahāñ ham ne

dabe dabe haiñ azal se isī liye ham log

uThā.e rakkhā hai kāñdhoñ pe āsmāñ ham ne

uñDel lī hai jahannum kī aag siine meñ

ragoñ meñ bhar liyā dozaḳh kā sab dhuāñ ham ne

faqat guloñ ko nahīñ nazm-e-gulsitāñ se gila

sunā hai ġhaur se kāñToñ kā bhī bayāñ ham ne

ham ek duuje se Darte haiñ is liye 'rāhat'

rakhā hai jannat-o-dozaḳh ko darmiyāñ ham ne

samajh ke sare sahaaron ko raegan hum ne

utar phenka hai kashti ka baadban hum ne

ye kam subut hai mahshar mein be-gunahi ka

ki apne honTon pe pheri nahin zaban hum ne

jo baat chheDi hai hum ne hamein bhi 'ilm nahin

ki KHatm karna hai is baat ko kahan hum ne

dabe dabe hain azal se isi liye hum log

uThae rakkha hai kandhon pe aasman hum ne

unDel li hai jahannum ki aag sine mein

ragon mein bhar liya dozaKH ka sab dhuan hum ne

faqat gulon ko nahin nazm-e-gulsitan se gila

suna hai ghaur se kanTon ka bhi bayan hum ne

hum ek duje se Darte hain is liye 'rahat'

rakha hai jannat-o-dozaKH ko darmiyan hum ne