samajh mein uski maqam-e-bashar nahin aaya

samajh meñ us kī maqām-e-bashar nahīñ aayā

jise ḳhud apne sivā kuchh nazar nahīñ aayā

rahegī pyāsī ye dhartī mire ḳhudā kab tak

ruteñ guzar ga.iiñ bādal idhar nahīñ aayā

hazār chāñd sitāroñ kī sair kar aa.e

hameñ zamīn pe chalnā magar nahīñ aayā

zamīr bechnā āsāñ sahī magar yaaro

ḳhatā muaaf hameñ ye hunar nahīñ aayā

bhale the din to hazāroñ the gird-o-pesh mire

paḌā jo vaqt to koī nazar nahīñ aayā

ye sāneha hai mire ahd kā ki jab dekhā

koī bhī shahr meñ muḳhlis nazar nahīñ aayā

abhī se kis liye pathrāv kā samāñ hai 'shafīq'

abhī to phal bhī koī peḌ par nazar nahīñ aayā

samajh mein us ki maqam-e-bashar nahin aaya

jise KHud apne siwa kuchh nazar nahin aaya

rahegi pyasi ye dharti mere KHuda kab tak

ruten guzar gain baadal idhar nahin aaya

hazar chand sitaron ki sair kar aae

hamein zamin pe chalna magar nahin aaya

zamir bechna aasan sahi magar yaro

KHata muaf hamein ye hunar nahin aaya

bhale the din to hazaron the gird-o-pesh mere

paDa jo waqt to koi nazar nahin aaya

ye saneha hai mere ahd ka ki jab dekha

koi bhi shahr mein muKHlis nazar nahin aaya

abhi se kis liye pathraw ka saman hai 'shafiq'

abhi to phal bhi koi peD par nazar nahin aaya