samajh mein ye nahin aata ki dil ki KHu kya thi

samajh meñ ye nahīñ aatā ki dil kī ḳhū kyā thī

safar to aaTh pahar kā thā justujū kyā thī

vo ābshār ke paanī sī tab.a rakhtā thā

magar thake hue lahje kī guftugū kyā thī

huī shikast jahāñ fat.h kā yaqīn huā

koī chhupā huā dushman thā aarzū kyā thī

talāsh karte ho kis shai ko is ḳharābe meñ

daraḳht hī na rahe shāḳh-e-rang-o-bū kyā thī

tū āftāb agar thā to kyoñ ġhurūb huā

ye raushnī sī tire baa'd chaar sū kyā thī

daraḳht puḳhta chhateñ toḌ kar nikal aa.e

ye ik azaab hī thā quvvat-e-numū kyā thī

samajh mein ye nahin aata ki dil ki KHu kya thi

safar to aaTh pahar ka tha justuju kya thi

wo aabshaar ke pani si taba rakhta tha

magar thake hue lahje ki guftugu kya thi

hui shikast jahan fath ka yaqin hua

koi chhupa hua dushman tha aarzu kya thi

talash karte ho kis shai ko is KHarabe mein

daraKHt hi na rahe shaKH-e-rang-o-bu kya thi

tu aaftab agar tha to kyon ghurub hua

ye raushni si tere ba'd chaar su kya thi

daraKHt puKHta chhaten toD kar nikal aae

ye ek azab hi tha quwwat-e-numu kya thi