samajh raha hai teri har KHata ka hami mujhe

samajh rahā hai tirī har ḳhatā kā haamī mujhe

dikhā rahā hai ye ā.īna merī ḳhāmī mujhe

zamāñ kī qaid hai koī na hai makāñ kī ḳhabar

kahāñ kahāñ liye phirtī hai tishna-kāmī mujhe

nahīñ ki jur.at-e-iz.hār-e-ishq mujh meñ nahīñ

tabāh kar ke rahī merī nek-nāmī mujhe

koī nahīñ mirā saame isī meñ ḳhush huuñ maiñ

ki raas aa.ī bahut merī ḳhud-kalāmī mujhe

maza milā na kabhī manzil-āshnā.ī kā

kuchh aisā kar ga.ī āvāra tez-gāmī mujhe

hasīn chehroñ ko tevarī ke bal bigāḌte haiñ

girāñ guzartī hai fitrat kī bad-nizāmī mujhe

sharāb-e-tund kī talḳhī kā zā.iqa jaise

pasand aa.ī hasīnoñ kī bad-kalāmī mujhe

nashāt-e-takya-e-zānū se sar uThāne tak

sitāra sub.h kā detā rahā salāmī mujhe

maiñ farsh-e-rāh yūñhī to nahīñ huā 'āzar'

niDhāl kar ke rahī us kī ḳhush-ḳhirāmī mujhe

samajh raha hai teri har KHata ka hami mujhe

dikha raha hai ye aaina meri KHami mujhe

zaman ki qaid hai koi na hai makan ki KHabar

kahan kahan liye phirti hai tishna-kaami mujhe

nahin ki jurat-e-izhaar-e-ishq mujh mein nahin

tabah kar ke rahi meri nek-nami mujhe

koi nahin mera same isi mein KHush hun main

ki ras aai bahut meri KHud-kalami mujhe

maza mila na kabhi manzil-ashnai ka

kuchh aisa kar gai aawara tez-gami mujhe

hasin chehron ko tewari ke bal bigaDte hain

giran guzarti hai fitrat ki bad-nizami mujhe

sharab-e-tund ki talKHi ka zaiqa jaise

pasand aai hasinon ki bad-kalami mujhe

nashat-e-takya-e-zanu se sar uThane tak

sitara subh ka deta raha salami mujhe

main farsh-e-rah yunhi to nahin hua 'azar'

niDhaal kar ke rahi us ki KHush-KHirami mujhe