samajh rahe the ki ab shab gai sahar aai

samajh rahe the ki ab shab ga.ī sahar aa.ī

tire dayār meñ vo raushnī nazar aa.ī

nishāt-o-ġham kā ta.alluq bhī kyā ta.alluq hai

abhī hañse bhī na the ham ki aañkh bhar aa.ī

manā rahe haiñ manānā thā jin ko jashn-e-bahār

mire nasīb meñ taz.īn-e-bām-o-dar aa.ī

ye aur baat ki sab kuchh kahā ho sach tū ne

mujhe hañsī to tirī baat baat par aa.ī

kamāl hai ye tasavvur kī mashq-e-paiham kā

tire hijāb kī tasvīr bhī utar aa.ī

vasūq-e-azm pe haiñ kāmrāniyāñ mauqūf

ḳhayāl-e-rahguzar aate hī rahguzar aa.ī

balā se ahd-e-bahārāñ ne dil ko zaḳhm diye

'nasīr' sūrat-e-gulzār to nikhar aa.ī

samajh rahe the ki ab shab gai sahar aai

tere dayar mein wo raushni nazar aai

nishat-o-gham ka talluq bhi kya talluq hai

abhi hanse bhi na the hum ki aankh bhar aai

mana rahe hain manana tha jin ko jashn-e-bahaar

mere nasib mein tazin-e-baam-o-dar aai

ye aur baat ki sab kuchh kaha ho sach tu ne

mujhe hansi to teri baat baat par aai

kamal hai ye tasawwur ki mashq-e-paiham ka

tere hijab ki taswir bhi utar aai

wasuq-e-azm pe hain kaamraniyan mauquf

KHayal-e-rahguzar aate hi rahguzar aai

bala se ahd-e-bahaaran ne dil ko zaKHm diye

'nasir' surat-e-gulzar to nikhar aai