samajh rahe the ki apni sudhar gai duniya

samajh rahe the ki apnī sudhar ga.ī duniyā

hameñ to muft meñ badnām kar ga.ī duniyā

mutālboñ se nahīñ mil sakī najāt kabhī

havas ke zinda taqāzoñ se bhar ga.ī duniyā

har ek aañkh meñ chaḌhtā huā anā kā nasha

har ek harf-e-vafā se mukar ga.ī duniyā

asiir kar ke tabāhī ke mujh ko daldal meñ

batā.e kaun ye mujh ko kidhar ga.ī duniyā

vo kyā hue mire pur-kaif pur-sukūñ lamhe

mujhe talāsh hai jis kī kidhar ga.ī duniyā

kaTī huī hai har ik shāḳh peḌ se 'mohsin'

lo barg-e-ḳhushk sī ab ke bikhar ga.ī duniyā

samajh rahe the ki apni sudhar gai duniya

hamein to muft mein badnam kar gai duniya

mutalbon se nahin mil saki najat kabhi

hawas ke zinda taqazon se bhar gai duniya

har ek aankh mein chaDhta hua ana ka nasha

har ek harf-e-wafa se mukar gai duniya

asir kar ke tabahi ke mujh ko daldal mein

batae kaun ye mujh ko kidhar gai duniya

wo kya hue mere pur-kaif pur-sukun lamhe

mujhe talash hai jis ki kidhar gai duniya

kaTi hui hai har ek shaKH peD se 'mohsin'

lo barg-e-KHushk si ab ke bikhar gai duniya