سمجھ سکا کوئی رونے نہ مسکرانے سے

سمجھ سکا کوئی رونے نہ مسکرانے سے

مرا فسانہ جدا تھا ہر اک فسانے سے

شگفت خار خس و برگ ہے بجا لیکن

بہار آئے گی پھولوں کے مسکرانے سے

گزر رہا ہے کوئی کاروان برق و شرار

الٰہی خیر غریبوں کے آشیانے سے

بلا سے ایک ہی سجدہ ہو ان کے در پر ہو

نصیب جاگ بھی سکتا ہے آزمانے سے

زمیں پہ خاک کے ذرے قمر نہیں بنتے

فلک پہ چند ستاروں کے جگمگانے سے

ہر ایک شعر کی کاغذ پہ زندگی ہے جمالؔ

ملے گا کیا تجھے محفل میں داد پانے سے