سمجھنے سے سوا سمجھانے کا سب کو جنوں کیوں ہے

سمجھنے سے سوا سمجھانے کا سب کو جنوں کیوں ہے

لبوں پر طنز کے کلمات ہیں آنکھوں میں خوں کیوں ہے

جو بس زخم بروں کو بھرنے سے رکھتے ہیں دلچسپی

انہیں ہم کیسے بتلائیں ہمیں سوز دروں کیوں ہے

رواداری جو سننے کی تھی اب وہ بھی نہیں باقی

مرے سینے میں جو تکلیف ہے کیسے کہوں کیوں ہے

اسی تفہیم سے محرومی کا حاصل ہے یہ منظر

مجھے بے چینیاں کیوں ہیں تمہیں اتنا سکوں کیوں ہے

ہمارے روز و شب جب سب حقیقت ہیں تو پھر عاصمؔ

کوئی رخ ہو ہماری سوچ کا محور فسوں کیوں ہے