samajhne se siwa samjhane ka sab ko junun kyon hai

samajhne se sivā samjhāne kā sab ko junūñ kyoñ hai

laboñ par tanz ke kalmāt haiñ āñkhoñ meñ ḳhuuñ kyoñ hai

jo bas zaḳhm-e-barūñ ko bharne se rakhte haiñ dilchaspī

unheñ ham kaise batlā.eñ hameñ soz-e-darūñ kyoñ hai

ravādārī jo sunñe kī thī ab vo bhī nahīñ baaqī

mire siine meñ jo taklīf hai kaise kahūñ kyoñ hai

isī tafhīm se mahrūmī kā hāsil hai ye manzar

mujhe bechainiyāñ kyoñ haiñ tumheñ itnā sukūñ kyoñ hai

hamāre roz-o-shab jab sab haqīqat haiñ to phir 'āsim'

koī ruḳh ho hamārī soch kā mehvar fusūñ kyoñ hai

samajhne se siwa samjhane ka sab ko junun kyon hai

labon par tanz ke kalmat hain aankhon mein KHun kyon hai

jo bas zaKHm-e-barun ko bharne se rakhte hain dilchaspi

unhen hum kaise batlaen hamein soz-e-darun kyon hai

rawadari jo sunne ki thi ab wo bhi nahin baqi

mere sine mein jo taklif hai kaise kahun kyon hai

isi tafhim se mahrumi ka hasil hai ye manzar

mujhe bechainiyan kyon hain tumhein itna sukun kyon hai

hamare roz-o-shab jab sab haqiqat hain to phir 'asim'

koi ruKH ho hamari soch ka mehwar fusun kyon hai