samar-ruton mein to jhuk kar guzarna hoga

samar-rutoñ meñ to jhuk kar guzārnā hogā

shajar ko sang-e-malāmat sahārnā hogā

jo barf-zād haiñ teshe shuāoñ ke de kar

unheñ bhī taaza safar par ubhārnā hogā

karīm baap kī sūrat jadīd nasloñ ko

baḌe hunar se hamī ko sudhārnā hogā

jo zehn siim kī yalġhār se hue banjar

unheñ bhī husn-e-amal se sañvārnā hogā

laboñ pe phuul khilā.eñ diloñ ko raam kareñ

ḳhabar nahīñ kise kis din sudhārnā hogā

vo bastiyāñ jinheñ tārāj kar gayā dariyā

jadīd rang se un ko usārnā hogā

vo jin ko quvvat-o-mansab atā kiyā tū ne

mire ḳhudā unheñ yazdāñ pukārnā hogā

jalānā hoñgī hameñ kashtiyāñ lab-e-dariyā

ki yuuñ bhī josh-e-hamiyyat ubhārnā hogā

salīb-e-shab pe ubharnā hai shaan se 'aḳhtar'

sahar kā qarz hamī ko utārnā hogā

samar-ruton mein to jhuk kar guzarna hoga

shajar ko sang-e-malamat sahaarna hoga

jo barf-zad hain teshe shuaon ke de kar

unhen bhi taza safar par ubhaarna hoga

karim bap ki surat jadid naslon ko

baDe hunar se hami ko sudhaarna hoga

jo zehn sim ki yalghaar se hue banjar

unhen bhi husn-e-amal se sanwarna hoga

labon pe phul khilaen dilon ko ram karen

KHabar nahin kise kis din sudhaarna hoga

wo bastiyan jinhen taraj kar gaya dariya

jadid rang se un ko usarna hoga

wo jin ko quwwat-o-mansab ata kiya tu ne

mere KHuda unhen yazdan pukarna hoga

jalana hongi hamein kashtiyan lab-e-dariya

ki yun bhi josh-e-hamiyyat ubhaarna hoga

salib-e-shab pe ubharna hai shan se 'aKHtar'

sahar ka qarz hami ko utarna hoga