سنبھل اے قدم کہ یہ کارگاہ نشاط و غم ہے خبر بھی ہے

سنبھل اے قدم کہ یہ کارگاہ نشاط و غم ہے خبر بھی ہے

جسے لوگ کہتے ہیں رہ گزر کسی پا شکستہ کا گھر بھی ہے

مجھے مدتوں یہی وہم تھا کہ یہ خاک کیمیا بن گئی

اسی کشمکش میں گزر گئی کہ فغاں کروں تو اثر بھی ہے

ہمہ انکسار کی کیفیت ہے دم وداع کی بے بسی

مجھے یوں پیام سکوں نہ دے تجھے اپنے آپ سے ڈر بھی ہے

مری جرأتوں پہ بھی کر نظر تجھے چاہوں سو دفعہ ٹوٹ کر

یہ بجا کہ سینۂ شوق میں غم پاسبانئ در بھی ہے

تجھے آگہی کی نہیں خبر مری گمرہی پہ نہ طنز کر

ارے وقت وقت کی بات ہے یہی عیب رشک ہنر بھی ہے

کوئی اس کا درد بھی پوچھتا کہ وہ کچھ دنوں سے اداس ہے

یہ جنوں کی پرسش حال کیا جو ازل سے خاک بسر بھی ہے

یہ ہے بے گناہی کا ماجرا کوئی یوں ہی مجھ سے کھنچا رہا

یہی سوچ سوچ کے رہ گیا کہ مرے خدا کو خبر بھی ہے

تجھے کھو کے گو میں سنبھل گیا یہ نہ کہہ کہ شاذؔ بدل گیا

پس پردہ تیری پناہ میں مری شام بھی ہے سحر بھی ہے