sambhal ai qadam ki ye kar-gah-e-nishat-o-gham hai KHabar bhi hai

sambhal ai qadam ki ye kār-gāh-e-nishāt-o-ġham hai ḳhabar bhī hai

jise log kahte haiñ rahguzar kisī pā-shikasta kā ghar bhī hai

mujhe muddatoñ yahī vahm thā ki ye ḳhaak kīmiyā ban ga.ī

isī kashmakash meñ guzar ga.ī ki fuġhāñ karūñ to asar bhī hai

hama-inkisār kī kaifiyat hai dam-e-vidā.a kī bebasī

mujhe yuuñ payām-e-sukūñ na de tujhe apne aap se Dar bhī hai

mirī jur.atoñ pe bhī kar nazar tujhe chāhūñ sau dafa TuuT kar

ye bajā ki sīna-e-shauq meñ ġham-e-pāsbānī-e-dar bhī hai

tujhe āgahī kī nahīñ ḳhabar mirī gumrahī pe na tanz kar

are vaqt vaqt kī baat hai yahī aib rashk-e-hunar bhī hai

koī us kā dard bhī pūchhtā ki vo kuchh dinoñ se udaas hai

ye junūñ kī pursish-e-hāl kyā jo azal se ḳhāk-basar bhī hai

ye hai be-gunāhī kā mājrā koī yūñhī mujh se khiñchā rahā

yahī soch soch ke rah gayā ki mire ḳhudā ko ḳhabar bhī hai

tujhe kho ke go maiñ sambhal gayā ye na kah ki 'shāz' badal gayā

pas-e-parda terī panāh meñ mirī shaam bhī hai sahar bhī hai

sambhal ai qadam ki ye kar-gah-e-nishat-o-gham hai KHabar bhi hai

jise log kahte hain rahguzar kisi pa-shikasta ka ghar bhi hai

mujhe muddaton yahi wahm tha ki ye KHak kimiya ban gai

isi kashmakash mein guzar gai ki fughan karun to asar bhi hai

hama-inkisar ki kaifiyat hai dam-e-widaa ki bebasi

mujhe yun payam-e-sukun na de tujhe apne aap se Dar bhi hai

meri juraton pe bhi kar nazar tujhe chahun sau dafa TuT kar

ye baja ki sina-e-shauq mein gham-e-pasbani-e-dar bhi hai

tujhe aagahi ki nahin KHabar meri gumrahi pe na tanz kar

are waqt waqt ki baat hai yahi aib rashk-e-hunar bhi hai

koi us ka dard bhi puchhta ki wo kuchh dinon se udas hai

ye junun ki pursish-e-haal kya jo azal se KHak-basar bhi hai

ye hai be-gunahi ka majra koi yunhi mujh se khincha raha

yahi soch soch ke rah gaya ki mere KHuda ko KHabar bhi hai

tujhe kho ke go main sambhal gaya ye na kah ki 'shaz' badal gaya

pas-e-parda teri panah mein meri sham bhi hai sahar bhi hai