sambhal na pae to taqsir-e-waqai bhi nahin

sambhal na paa.e to taqsīr-e-vāqa.ī bhī nahīñ

har ik pe sahl kuchh ādāb-e-mai-kashī bhī nahīñ

idhar udhar se hadīs-e-ġham-e-jahāñ kah kar

tirī hī baat kī aur terī baat kī bhī nahīñ

vafā-e-vāda pe dil nukta-chīñ hai vo ḳhāmosh

hadīs-e-mehr-o-vafā aaj guftanī bhī nahīñ

bikhar ke husn-e-jahāñ kā nizām kyā hogā

ye barhamī tirī zulfoñ kī barhamī bhī nahīñ

shikast-e-sāġhar-o-mīnā ko ḳhaak rotā maiñ

girāñ abhī mire dil kī shikastagī bhī nahīñ

hazār shukr ki be-ḳhvāb hai sahar ke liye

vo chashm-e-nāz ki jo jāgtoñ meñ thī bhī nahīñ

ye zindagī hī talavvun-mizāj hai ai dost

tamām tark-e-vafā terī be-ruḳhī bhī nahīñ

ta.alluqāt-e-zamāna kī ik kaḌī ke sivā

kuchh aur ye tirā paimān-e-dostī bhī nahīñ

karam kī vajah na thī be-sabab ḳhafā bhī hai vo

mizāj-e-husn se ye baat duur thī bhī nahīñ

sambhal na pae to taqsir-e-waqai bhi nahin

har ek pe sahl kuchh aadab-e-mai-kashi bhi nahin

idhar udhar se hadis-e-gham-e-jahan kah kar

teri hi baat ki aur teri baat ki bhi nahin

wafa-e-wada pe dil nukta-chin hai wo KHamosh

hadis-e-mehr-o-wafa aaj guftani bhi nahin

bikhar ke husn-e-jahan ka nizam kya hoga

ye barhami teri zulfon ki barhami bhi nahin

shikast-e-saghar-o-mina ko KHak rota main

giran abhi mere dil ki shikastagi bhi nahin

hazar shukr ki be-KHwab hai sahar ke liye

wo chashm-e-naz ki jo jagton mein thi bhi nahin

ye zindagi hi talawwun-mizaj hai ai dost

tamam tark-e-wafa teri be-ruKHi bhi nahin

talluqat-e-zamana ki ek kaDi ke siwa

kuchh aur ye tera paiman-e-dosti bhi nahin

karam ki wajah na thi be-sabab KHafa bhi hai wo

mizaj-e-husn se ye baat dur thi bhi nahin