سمجھے ہوئے لوگوں کو بھی ہر بار سمجھنا

سمجھے ہوئے لوگوں کو بھی ہر بار سمجھنا

مشکل ہے بہت شہر کا معیار سمجھنا

دم بھر کی رفاقت بھی غنیمت ہے سفر میں

دیوار کو بھی سایۂ دیوار سمجھنا

وہ شخص جو دیتا ہے گناہوں کی گواہی

اس کو بھی برابر کا گنہ گار سمجھنا

طاقت نہیں لڑتی ہے لڑا کرتی ہے ہمت

ٹوٹے ہوئے بازو کو بھی پتوار سمجھنا

چلنے کی تمنا تھی پہنچنے کی نہیں تھی

اب ڈوب بھی جاؤں تو مجھے پار سمجھنا

یہ شہر ہی جب آپ کو پیارا ہے تو شاہدؔ

نفرت بھی اگر دے تو اسے پیار سمجھنا