samjhe hue logon ko bhi har bar samajhna

samjhe hue logoñ ko bhī har baar samajhnā

mushkil hai bahut shahr kā me'yār samajhnā

dam-bhar kī rifāqat bhī ġhanīmat hai safar meñ

dīvār ko bhī sāya-e-dīvār samajhnā

vo shaḳhs jo detā hai gunāhoñ kī gavāhī

us ko bhī barābar kā gunahgār samajhnā

tāqat nahīñ laḌtī hai laḌā kartī hai himmat

TuuTe hue baazū ko bhī patvār samajhnā

chalne kī tamanna thī pahuñchne kī nahīñ thī

ab Duub bhī jā.ūñ to mujhe paar samajhnā

ye shahr hī jab aap ko pyārā hai to 'shāhid'

nafrat bhī agar de to use pyaar samajhnā

samjhe hue logon ko bhi har bar samajhna

mushkil hai bahut shahr ka me'yar samajhna

dam-bhar ki rifaqat bhi ghanimat hai safar mein

diwar ko bhi saya-e-diwar samajhna

wo shaKHs jo deta hai gunahon ki gawahi

us ko bhi barabar ka gunahgar samajhna

taqat nahin laDti hai laDa karti hai himmat

TuTe hue bazu ko bhi patwar samajhna

chalne ki tamanna thi pahunchne ki nahin thi

ab Dub bhi jaun to mujhe par samajhna

ye shahr hi jab aap ko pyara hai to 'shahid'

nafrat bhi agar de to use pyar samajhna