samjhe the be-KHabar jinhen hushyar wo bhi hain

samjhe the be-ḳhabar jinheñ hushyār vo bhī haiñ

saaqī is anjuman ke nigah-dār vo bhī haiñ

jin ke lahū se dāman-e-sahrā hai lāla-rang

ai nargis-e-chaman tire bīmār vo bhī haiñ

arbāb-e-mai-kada se 'abas zid hai shaiḳh ko

ḳhush-fikr-o-ḳhush-mizāj-o-ḳhush-atvār vo bhī haiñ

la.a-e-girāñ-bahā ko samajhte haiñ jo ḳhazaf

yā-rab matā-e-dil ke ḳharīdār vo bhī haiñ

chup haiñ vo sun ke aaj mirī dāstān-e-ġham

insāf kyā kareñ ki ḳhatāvār vo bhī haiñ

taufīq jin ko ma.asiyat-e-ishq kī nahīñ

ai rahmat-e-tamām gunahgār vo bhī haiñ

ḳhud apne haal kī bhī jinheñ kuchh ḳhabar nahīñ

dair-o-haram ke mahram-e-asrār vo bhī haiñ

bad-tar haiñ dushmanoñ se kuchh aise bhī haiñ rafīq

jin ko shu'ūr-e-ġham nahīñ ġham-ḳhvār vo bhī haiñ

samjhe haiñ jo hayāt ko ḳhvāb-e-girāñ 'jamāl'

zid hai unheñ ki shā.ir-e-bedār vo bhī haiñ

samjhe the be-KHabar jinhen hushyar wo bhi hain

saqi is anjuman ke nigah-dar wo bhi hain

jin ke lahu se daman-e-sahra hai lala-rang

ai nargis-e-chaman tere bimar wo bhi hain

arbab-e-mai-kada se 'abas zid hai shaiKH ko

KHush-fikr-o-KHush-mizaj-o-KHush-atwar wo bhi hain

la-e-giran-baha ko samajhte hain jo KHazaf

ya-rab mata-e-dil ke KHaridar wo bhi hain

chup hain wo sun ke aaj meri dastan-e-gham

insaf kya karen ki KHatawar wo bhi hain

taufiq jin ko masiyat-e-ishq ki nahin

ai rahmat-e-tamam gunahgar wo bhi hain

KHud apne haal ki bhi jinhen kuchh KHabar nahin

dair-o-haram ke mahram-e-asrar wo bhi hain

bad-tar hain dushmanon se kuchh aise bhi hain rafiq

jin ko shu'ur-e-gham nahin gham-KHwar wo bhi hain

samjhe hain jo hayat ko KHwab-e-giran 'jamal'

zid hai unhen ki shair-e-bedar wo bhi hain