samjhen bhi donon kar rahi hain kya ye chaar panch

samjheñ bhī donoñ kar rahī haiñ kyā ye chaar pāñch

lauñDī ke yaar chaar haiñ biibī ke yaar pāñch

ab to sharīf-zādiyāñ kartī haiñ chaar pāñch

ḳhānam ke yaar chaar haiñ begam ke yaar pāñch

kal saat aadmī the jinhoñ ne kiyā ye haal

do to safed-posh the biibī gañvār pāñch

duniyā sarā hai beTiyoñ is kā shumār kyā

aate hī jaate rahte haiñ har roz chaar pāñch

in marduoñ ne sahl samajh lī hai naukrī

maañg ek kī hai aa.e haiñ umīd-vār pāñch

gintī jo yaad kartī hai din bhar ye chhokrī

sote meñ bhī pukārtī hai tiin chaar pāñch

dekhā jo das kā note jhaTak le ga.iiñ dasoñ

pahle to sirf māñgtī thiiñ vo udhār pāñch

samdhan batāo kis kā galā ab dabā.ūñ maiñ

chhe marduoñ meñ tum ne mañgā.e haiñ haar pāñch

bhārī hai das javānoñ pe rustam kī ye bahū

lagte haiñ pālkī meñ do tarfa kahār pāñch

thī panjatan kī yaad jo thī jāñkanī ke vaqt

muñh se mire nikal gayā be-iḳhtiyār pāñch

chaar aadmī ke sāmne kai de ga.iiñ thī tum

ab kaun māntā hai kaho tum hazār pāñch

pān.cho savāroñ meñ to vo ḳhud bhī the kyoñ na aa.e

mujh ek ke pakaḌne ko bheje savār pāñch

'shaidā' kahāñ se sīkhe ye gun us ne āḳhirash

mayyā to jāntī hī na thī us kī chaar pāñch

samjhen bhi donon kar rahi hain kya ye chaar panch

launDi ke yar chaar hain bibi ke yar panch

ab to sharif-zadiyan karti hain chaar panch

KHanam ke yar chaar hain begam ke yar panch

kal sat aadmi the jinhon ne kiya ye haal

do to safed-posh the bibi ganwar panch

duniya sara hai beTiyon is ka shumar kya

aate hi jate rahte hain har roz chaar panch

in marduon ne sahl samajh li hai naukri

mang ek ki hai aae hain umid-war panch

ginti jo yaad karti hai din bhar ye chhokri

sote mein bhi pukarti hai tin chaar panch

dekha jo das ka note jhaTak le gain dason

pahle to sirf mangti thin wo udhaar panch

samdhan batao kis ka gala ab dabaun main

chhe marduon mein tum ne mangae hain haar panch

bhaari hai das jawanon pe rustam ki ye bahu

lagte hain palki mein do tarfa kahaar panch

thi panjatan ki yaad jo thi jaankani ke waqt

munh se mere nikal gaya be-iKHtiyar panch

chaar aadmi ke samne kai de gain thi tum

ab kaun manta hai kaho tum hazar panch

pancho sawaron mein to wo KHud bhi the kyon na aae

mujh ek ke pakaDne ko bheje sawar panch

'shaida' kahan se sikhe ye gun us ne aaKHirash

mayya to jaanti hi na thi us ki chaar panch