samjhen jo mere gham ko wo apne nahin rahe

samjheñ jo mere ġham ko vo apne nahīñ rahe

jhūTe bahut haiñ shahr meñ sachche nahīñ rahe

tū ne to apnī ziist bhī kar lī basar magar

tujh se bichhaḌ ke ham to kahīñ ke nahīñ rahe

ham ḳhush hue sabhī kī taraqqī ko dekh kar

lekin tumhārī tarah sulagte nahīñ rahe

kal to kisī bhī raah meñ ḳhauf-o-ḳhatar na thā

mahfūz aaj shahr ke raste nahīñ rahe

rāh-e-vafā meñ mushkileñ aa.ī to thiiñ bahut

lekin ham apnī raah badalte nahīñ rahe

jab se hayāt ashk-e-nadāmat se dhoī hai

ā.īna-e-hayāt pe dhabbe nahīñ rahe

jo hukm-e-vāldain kī ta.amīl kar sakeñ

is daur meñ 'hilāl' vo bachcha nahīñ rahe

samjhen jo mere gham ko wo apne nahin rahe

jhuTe bahut hain shahr mein sachche nahin rahe

tu ne to apni zist bhi kar li basar magar

tujh se bichhaD ke hum to kahin ke nahin rahe

hum KHush hue sabhi ki taraqqi ko dekh kar

lekin tumhaari tarah sulagte nahin rahe

kal to kisi bhi rah mein KHauf-o-KHatar na tha

mahfuz aaj shahr ke raste nahin rahe

rah-e-wafa mein mushkilen aai to thin bahut

lekin hum apni rah badalte nahin rahe

jab se hayat ashk-e-nadamat se dhoi hai

aaina-e-hayat pe dhabbe nahin rahe

jo hukm-e-waldain ki tamil kar saken

is daur mein 'hilal' wo bachcha nahin rahe