samundar mein utarta ek jazira dekhte rahna

samundar meñ utartā ik jazīra dekhte rahnā

ḳhud apnī Dūbtī nabzoñ ko ab kyā dekhte rahnā

jamāl-e-māh-o-anjum kā hai charchā kor-bīnoñ meñ

ab ai ahl-e-nazar aage tamāshā dekhte rahnā

abhī maiñ apnī hī hastī ke madd-o-jazr meñ gum huuñ

kahāñ hisse meñ apne shor-e-dariyā dekhte rahnā

chamak se us kī nā-mumkin mirī āñkheñ chamak uTTheñ

yahāñ se haar ke jā.egī duniyā dekhte rahnā

luTā ke phir thake-māñdoñ ke sar pe chhāoñ jhūmegī

harī poshāk meñ shāḳh-e-barahna dekhte rahnā

na ye kamra na ye fehrist hai ‘izzat-ma.āboñ kī

ye qabristān 'ohdoñ kī hai katba dekhte rahnā

talab kī gard se dhuñdle hue chehroñ ke ā.īne

'nazīr' ab putliyoñ meñ dasht-o-sahrā dekhte rahnā

samundar mein utarta ek jazira dekhte rahna

KHud apni Dubti nabzon ko ab kya dekhte rahna

jamal-e-mah-o-anjum ka hai charcha kor-binon mein

ab ai ahl-e-nazar aage tamasha dekhte rahna

abhi main apni hi hasti ke madd-o-jazr mein gum hun

kahan hisse mein apne shor-e-dariya dekhte rahna

chamak se us ki na-mumkin meri aankhen chamak uTThen

yahan se haar ke jaegi duniya dekhte rahna

luTa ke phir thake-mandon ke sar pe chhaon jhumegi

hari poshak mein shaKH-e-barahna dekhte rahna

na ye kamra na ye fehrist hai ‘izzat-maabon ki

ye qabristan 'ohdon ki hai katba dekhte rahna

talab ki gard se dhundle hue chehron ke aaine

'nazir' ab putliyon mein dasht-o-sahra dekhte rahna