samundar par aa baiThe magar kya

samundar paar aa baiThe magar kyā

na.e mulkoñ meñ ban jaate haiñ ghar kyā

na.e mulkoñ meñ lagtā hai nayā sab

zamīñ kyā āsmāñ kyā aur shajar kyā

udhar ke log kyā kyā sochte haiñ

idhar baste haiñ ḳhvāboñ ke nagar kyā

har ik raste pe chal kar sochte haiñ

ye rasta jā rahā hai apne ghar kyā

kabhī raste ye ham se pūchhte haiñ

musāfir ho rahe haiñ dar-ba-dar kyā

kabhī sochā hai miTTī ke alāva

hameñ kahte haiñ ye dīvār-o-dar kyā

yahāñ apne bahut rahte haiñ lekin

kisī ko bhī kisī kī hai ḳhabar kyā

kise fursat ki in bātoñ pe soche

mashīnoñ ne kiyā hai jaan par kyā

mashīnoñ ke ghanere jañgaloñ meñ

bhaTaktī ruuh kyā us kā safar kyā

yahāñ ke aadmī haiñ do ruḳhe kyuuñ

mohazzab ho ga.e haiñ jānvar kyā

adhūre kaam chhoḌe jā rahe haiñ

idhar ko ā.eñge bār-e-digar kyā

ye kis ke ashk haiñ auj-e-falak tak

koī rotā rahā hai raat bhar kyā

chaman meñ har taraf aañsū haiñ 'jāved'

tirī hālat kī sab ko hai ḳhabar kyā

samundar par aa baiThe magar kya

nae mulkon mein ban jate hain ghar kya

nae mulkon mein lagta hai naya sab

zamin kya aasman kya aur shajar kya

udhar ke log kya kya sochte hain

idhar baste hain KHwabon ke nagar kya

har ek raste pe chal kar sochte hain

ye rasta ja raha hai apne ghar kya

kabhi raste ye hum se puchhte hain

musafir ho rahe hain dar-ba-dar kya

kabhi socha hai miTTi ke alawa

hamein kahte hain ye diwar-o-dar kya

yahan apne bahut rahte hain lekin

kisi ko bhi kisi ki hai KHabar kya

kise fursat ki in baaton pe soche

mashinon ne kiya hai jaan par kya

mashinon ke ghanere jangalon mein

bhaTakti ruh kya us ka safar kya

yahan ke aadmi hain do ruKHe kyun

mohazzab ho gae hain jaanwar kya

adhure kaam chhoDe ja rahe hain

idhar ko aaenge bar-e-digar kya

ye kis ke ashk hain auj-e-falak tak

koi rota raha hai raat bhar kya

chaman mein har taraf aansu hain 'jawed'

teri haalat ki sab ko hai KHabar kya