samundaron se bahut dur aashna Thahre

samundaroñ se bahut duur āshnā Thahre

ġhanīm mere safīne ke nāḳhudā Thahre

payām-e-haq ke amiiñ saare be-navā Thahre

ḳhudā kare ki mirī ḳhāmushī sadā Thahre

bujhā ke jaatī hai kitne charāġh ulfat ke

kabhī jo shahr meñ nafrat kī ye havā Thahre

chhupā ke jaanā paḌā ā.inoñ ko muñh apnā

nigāh-e-ḳhisht meñ jab sang aa.ina Thahre

nigār-ḳhāna-e-dil hai ujaaḌ muddat se

ho jis ke dil meñ Thaharne kā hausla Thahre

hamāre ḳhuun ke chhīñTe haiñ jin ke dāman par

nigāh-e-munsif-e-daurāñ meñ be-ḳhatā Thahre

tirī ḳhushī ko bhalā kaise ajnabī kah duuñ

mire liye to tire ġham bhī āshnā Thahre

hai kis kā naam lakīroñ meñ haath kī pūchhūñ

kabhī jo shahr meñ vo ramz-āshnā Thahre

bhaTak rahī hai ik umiid meñ idhar se udhar

qubūliyat kā khule dar to ye du'ā Thahre

bujhā huuñ maiñ to karūñ kis liye gila āḳhir

havā ke sāmne kab tak koī diyā Thahre

visāl-e-yār kī mehnat jo kar rahā huuñ maiñ

firāq-e-yār hī shāyad mirā sila Thahre

yahī hai riit jahāñ kī vafā kiyā jis se

usī bashar kī nigāhoñ meñ bevafā Thahre

isī umiid pe rakkhā hai ḳhushk hoñToñ ko

kabhī to kisht-e-badan par koī ghaTā Thahre

hamāre ġham meñ to halkān ho ga.iiñ rāheñ

kisī sarā.e meñ bhūle se ham jo aa Thahre

chhatoñ pe jaal bichhā.e hue haiñ sab 'ash.har'

kahāñ pe jā ke parindoñ kā qāfila Thahre

samundaron se bahut dur aashna Thahre

ghanim mere safine ke naKHuda Thahre

payam-e-haq ke amin sare be-nawa Thahre

KHuda kare ki meri KHamushi sada Thahre

bujha ke jati hai kitne charagh ulfat ke

kabhi jo shahr mein nafrat ki ye hawa Thahre

chhupa ke jaana paDa aainon ko munh apna

nigah-e-KHisht mein jab sang aaina Thahre

nigar-KHana-e-dil hai ujaD muddat se

ho jis ke dil mein Thaharne ka hausla Thahre

hamare KHun ke chhinTe hain jin ke daman par

nigah-e-munsif-e-dauran mein be-KHata Thahre

teri KHushi ko bhala kaise ajnabi kah dun

mere liye to tere gham bhi aashna Thahre

hai kis ka nam lakiron mein hath ki puchhun

kabhi jo shahr mein wo ramz-ashna Thahre

bhaTak rahi hai ek umid mein idhar se udhar

qubuliyat ka khule dar to ye du'a Thahre

bujha hun main to karun kis liye gila aaKHir

hawa ke samne kab tak koi diya Thahre

visal-e-yar ki mehnat jo kar raha hun main

firaq-e-yar hi shayad mera sila Thahre

yahi hai rit jahan ki wafa kiya jis se

usi bashar ki nigahon mein bewafa Thahre

isi umid pe rakkha hai KHushk honTon ko

kabhi to kisht-e-badan par koi ghaTa Thahre

hamare gham mein to halkan ho gain rahen

kisi sarae mein bhule se hum jo aa Thahre

chhaton pe jal bichhae hue hain sab 'ashhar'

kahan pe ja ke parindon ka qafila Thahre