sana-e-KHwaja mere zehn koi mazmun soch

sanā-e-ḳhvāja mere zehn koī mazmūñ soch

janāb vādī-e-hairat meñ gum huuñ kyā sochūñ

zabān marhala-e-mad.h pesh hai kuchh bol

majā-e-harf-zadan hī nahīñ hai kyā bolūñ

qalam bayāz-e-aqīdat meñ koī misrā likh

bajā kahā sar-e-taslīm ḳham hai kyā likhkhūñ

shu.ūr un ke maqām-e-payambarī ko samajh

maiñ qaid-e-had meñ huuñ vo be-karāñ maiñ kyā samjhūñ

ḳhirad ba-qadr-e-rasā.ī to un ke ilm ko jaan

maiñ nā-rasā.ī kā nuqta huuñ un ko kyā jānūñ

ḳhayāl gumbad-e-ḳhazrā kī samt uḌ par khol

ye maiñ huuñ aur ye mere bāl-o-par haiñ kyā kholūñ

talab madīne chaleñ nekiyoñ ke daftar bāñdh

yahāñ ye raḳht-e-safar hī nahīñ hai kyā bāñdhūñ

nigāh dekh ki hai rū-ba-rū dyār-e-jamāl

hai zarra zarra yahāñ āftāb kyā dekhūñ

dil un se harf-e-duā sheva-e-tamanna maañg

bilā savāl vo dāman bhareñ to ''kyā māñgūñ

huzūr ijz-e-bayāñ ko bayāñ samajh lījiye

tihī hai dāman-e-fan āstāñ pe kyā lā.ūñ

sana-e-KHwaja mere zehn koi mazmun soch

janab wadi-e-hairat mein gum hun kya sochun

zaban marhala-e-madh pesh hai kuchh bol

maja-e-harf-zadan hi nahin hai kya bolun

qalam bayaz-e-aqidat mein koi misra likh

baja kaha sar-e-taslim KHam hai kya likhkhun

shuur un ke maqam-e-payambari ko samajh

main qaid-e-had mein hun wo be-karan main kya samjhun

KHirad ba-qadr-e-rasai to un ke ilm ko jaan

main na-rasai ka nuqta hun un ko kya jaanun

KHayal gumbad-e-KHazra ki samt uD par khol

ye main hun aur ye mere baal-o-par hain kya kholun

talab madine chalen nekiyon ke daftar bandh

yahan ye raKHt-e-safar hi nahin hai kya bandhun

nigah dekh ki hai ru-ba-ru dyar-e-jamal

hai zarra zarra yahan aaftab kya dekhun

dil un se harf-e-dua shewa-e-tamanna mang

bila sawal wo daman bharen to kya mangun

huzur ijz-e-bayan ko bayan samajh lijiye

tihi hai daman-e-fan aastan pe kya laun