صنم صنم نہ پکارے خدا خدا نہ کرے

صنم صنم نہ پکارے خدا خدا نہ کرے

وہ چوٹ کھائی ہے دل نے کہ اب دعا نہ کرے

ادھر نہ دیکھیے ورنہ یہ شہر نا پرساں

تمہاری ایک ذرا بے رخی سے کیا نہ کرے

میں اپنے دیس میں بھی اجنبی سا لگتا ہوں

کوئی خلوص نہ برتے کوئی وفا نہ کرے

بس اک خراب تمنا ہمیں نظر آئے

سلوک آپ کریں جو وہی زمانہ کرے

غریب شہر کی یہ نارسائیاں توبہ

تمہارے در پہ بھی آیا مگر صدا نہ کرے

اب ایسے زود فراموش سے بھی کیا کہنا

کبھی جو بات بنائے کبھی بہانہ کرے

کرن اسیر مہک مضمحل ہے اب سرمدؔ

میں ایسے دور میں بھی چپ رہوں خدا نہ کرے