sanam sanam na pukare KHuda KHuda na kare

sanam sanam na pukāre ḳhudā ḳhudā na kare

vo choT khaa.ī hai dil ne ki ab duā na kare

udhar na dekhiye varna ye shahr-e-nā-pursāñ

tumhārī ek zarā be-ruḳhī se kyā na kare

maiñ apne des meñ bhī ajnabī sā lagtā huuñ

koī ḳhulūs na barte koī vafā na kare

bas ik ḳharāb-e-tamanna hamīñ nazar aa.e

sulūk aap kareñ jo vahī zamāna kare

ġharīb-e-shahr kī ye nā-rasā.iyāñ tauba

tumhāre dar pe bhī aaya magar sadā na kare

ab aise zūd-farāmosh se bhī kyā kahnā

kabhī jo baat banā.e kabhī bahāna kare

kiran asiir mahak muzmahil hai ab 'sarmad'

maiñ aise daur meñ bhī chup rahūñ ḳhudā na kare

sanam sanam na pukare KHuda KHuda na kare

wo choT khai hai dil ne ki ab dua na kare

udhar na dekhiye warna ye shahr-e-na-pursan

tumhaari ek zara be-ruKHi se kya na kare

main apne des mein bhi ajnabi sa lagta hun

koi KHulus na barte koi wafa na kare

bas ek KHarab-e-tamanna hamin nazar aae

suluk aap karen jo wahi zamana kare

gharib-e-shahr ki ye na-rasaiyan tauba

tumhaare dar pe bhi aaya magar sada na kare

ab aise zud-faramosh se bhi kya kahna

kabhi jo baat banae kabhi bahana kare

kiran asir mahak muzmahil hai ab 'sarmad'

main aise daur mein bhi chup rahun KHuda na kare