sanam se mohabbat bhi bezariyan bhi

sanam se mohabbat bhī bezāriyāñ bhī

junūñ-koshiyāñ bhī haiñ hoshyāriyāñ bhī

mohabbat kī duniyā mohabbat kā aalam

ki hushyāriyāñ bhī haiñ sarshāriyāñ bhī

kabhī sirf patthar kabhī devtā hai

haiñ ḳhuddāriyāñ bhī parastāriyāñ bhī

mohabbat ke rāz-o-niyāz allāh allāh

haiñ shikve gile bhī vafādāriyāñ bhī

hai pur-lutf manzil to pur-ḳhār rāheñ

ki āsāniyāñ bhī haiñ dushvāriyāñ bhī

jarāhat bhī jāñ-baḳhsh marham bhī dil-kash

dil-āzāriyāñ bhī haiñ ġham-ḳhvāriyāñ bhī

zarā sinf-e-nāzuk kī himmat to dekho

haiñ kamzoriyāñ bhī jigar-dāriyāñ bhī

hai va.adoñ meñ lazzat bahānoñ meñ jiddat

vafā.eñ bhī haiñ aur jafā-kāriyāñ bhī

mohabbat ḳhatā bhī hai uzr-e-ḳhatā bhī

pashemāniyāñ bhī haiñ lāchāriyāñ bhī

'habīb' aadmī bhī ajab chīstāñ hai

mohabbat bhī hai aur siyah-kāriyāñ bhī

sanam se mohabbat bhi bezariyan bhi

junun-koshiyan bhi hain hoshyariyan bhi

mohabbat ki duniya mohabbat ka aalam

ki hushyariyan bhi hain sarshaariyan bhi

kabhi sirf patthar kabhi dewta hai

hain KHuddariyan bhi parastariyan bhi

mohabbat ke raaz-o-niyaz allah allah

hain shikwe gile bhi wafadariyan bhi

hai pur-lutf manzil to pur-KHar rahen

ki aasaniyan bhi hain dushwariyan bhi

jarahat bhi jaan-baKHsh marham bhi dil-kash

dil-azariyan bhi hain gham-KHwariyan bhi

zara sinf-e-nazuk ki himmat to dekho

hain kamzoriyan bhi jigar-dariyan bhi

hai wadon mein lazzat bahanon mein jiddat

wafaen bhi hain aur jafa-kariyan bhi

mohabbat KHata bhi hai uzr-e-KHata bhi

pashemaniyan bhi hain lachaariyan bhi

'habib' aadmi bhi ajab chistan hai

mohabbat bhi hai aur siyah-kariyan bhi