صنعت نہ ہوگی تاہم کیا چیز ہو گئے تم

صنعت نہ ہوگی تاہم کیا چیز ہو گئے تم

ہر شخص سے تواضع ہر بات پر تبسم

دیکھو نہ میرے دل کی تصویر پائمالی

اپنے سے خود نہ نفرت کرنے لگو کہیں تم

جس دن سے تیرے دل تک پہنچیں مری نگاہیں

یکساں ہے مجھ کو تیری خاموشی و تکلم

ہے کس مقام پر اب الفت خدا ہی جانے

ہیں وہ بھی آج چپ چپ بیٹھے ہیں ہم بھی گم صم

میں سوچ میں تھا چھوڑوں کس طرح دو جہاں کو

اچھا ہوا کہ مجھ کو ایسے میں مل گئے تم

میکشؔ سا آدمی اور الفت کی سخت راہیں

ہر گام پر ہے لغزش ہر گام پر تصادم