sanbhaalta hai tera dast-e-moatabar mujhko

sañbhāltā hai tirā dast-e-mo'atabar mujh ko

to kis liye ho koī ḳhauf yā ḳhatar mujh ko

bas ek baar tirī justujū meñ niklā thā

phir is ke baad na apnī milī ḳhabar mujh ko

vo ik makān jo parchhā.iyoñ kā maskan hai

vahī bulātā hai muddat se raat bhar mujh ko

khulā yahī ki hai vo zard mausamoñ kā naqīb

jo lag rahā thā bahāroñ kā nāma-bar mujh ko

na jaane kab se khaḌā huuñ ḳhirad kī sarhad par

havā-e-kū-e-junūñ aa shikār kar mujh ko

kuchh intizām na.e bāl-o-par kā ho jaa.e

digar jahān kā darpesh hai safar mujh ko

sañvārne meñ lagā thā maiñ jis ke shām-o-sahar

samajh rahā thā vahī shaḳhs be-hunar mujh ko

havā-e-sub.h hai yā hai shamīm-e-jāñ-afroz

jagāne aatā hai koī dam-e-sahar mujh ko

ye sochtā huuñ ki sahrā ko apnā ghar kar luuñ

ki raas aa na sake apne bām-o-dar mujh ko

nazar jhukā ke mujhe DhūñD apne paikar meñ

talāsh kartā hai kyoñ tū idhar udhar mujh ko

mujhe talāsh thī jis kī vahī milā na 'mujīb'

qadam qadam pe mile yuuñ to dīda-var mujh ko

sanbhaalta hai tera dast-e-mo'atabar mujh ko

to kis liye ho koi KHauf ya KHatar mujh ko

bas ek bar teri justuju mein nikla tha

phir is ke baad na apni mili KHabar mujh ko

wo ek makan jo parchhaiyon ka maskan hai

wahi bulata hai muddat se raat bhar mujh ko

khula yahi ki hai wo zard mausamon ka naqib

jo lag raha tha bahaaron ka nama-bar mujh ko

na jaane kab se khaDa hun KHirad ki sarhad par

hawa-e-ku-e-junun aa shikar kar mujh ko

kuchh intizam nae baal-o-par ka ho jae

digar jahan ka darpesh hai safar mujh ko

sanwarne mein laga tha main jis ke sham-o-sahar

samajh raha tha wahi shaKHs be-hunar mujh ko

hawa-e-subh hai ya hai shamim-e-jaan-afroz

jagane aata hai koi dam-e-sahar mujh ko

ye sochta hun ki sahra ko apna ghar kar lun

ki ras aa na sake apne baam-o-dar mujh ko

nazar jhuka ke mujhe DhunD apne paikar mein

talash karta hai kyon tu idhar udhar mujh ko

mujhe talash thi jis ki wahi mila na 'mujib'

qadam qadam pe mile yun to dida-war mujh ko