سنبھل کر راہ میں چلنا وہی پتھر سکھاتا ہے

سنبھل کر راہ میں چلنا وہی پتھر سکھاتا ہے

ہمارے پاؤں کے آگے جو ٹھوکر بن کے آتا ہے

نہیں دیوار کے زخموں کا کچھ احساس انساں کو

جو کیلیں گاڑنے کے بعد تصویریں لگاتا ہے

میں جیسے واچنالیہ میں رکھا اخبار ہوں کوئی

جو پڑھتا ہے وہ بے ترتیب اکثر چھوڑ جاتا ہے

مصور پیاس کی حد سے گزرتا ہے کوئی جب بھی

تبھی تصویر کاغذ پر سمندر کی بناتا ہے

یہ سچ ہے سیڑھیاں شہرت کی چڑھ جانے کے بعد انساں

سہارا دینے والے ہی کو اکثر بھول جاتا ہے

نہ ایسے شخص کو چوکھٹ سے خالی ہاتھ لوٹاؤ

جو اک روٹی کے بدلے سو دعائیں دے کے جاتا ہے

بہت مشکل ہے نازؔ احسان کا بدلہ چکا پانا

دیے کو خود دھواں اس کا اکیلا چھوڑ جاتا ہے