sanbhal kar rah mein chalna wahi patthar sikhata hai

sañbhal kar raah meñ chalnā vahī patthar sikhātā hai

hamāre paañv ke aage jo Thokar ban ke aatā hai

nahīñ dīvār ke zaḳhmoñ kā kuchh ehsās insāñ ko

jo kīleñ gāḌne ke baa'd tasvīreñ lagātā hai

maiñ jaise vāchanālaya meñ rakhā aḳhbār huuñ koī

jo paḌhtā hai vo be-tartīb aksar chhoḌ jaatā hai

musavvir pyaas kī had se guzartā hai koī jab bhī

tabhī tasvīr kāġhaz par samundar kī banātā hai

ye sach hai sīḌhiyāñ shohrat kī chaḌh jaane ke baa'd insāñ

sahārā dene vaale hī ko aksar bhuul jaatā hai

na aise shaḳhs ko chaukhaT se ḳhālī haath lau.Tāo

jo ik roTī ke badle sau du'ā.eñ de ke jaatā hai

bahut mushkil hai 'nāz' ehsān kā badla chukā paanā

diye ko ḳhud dhuāñ us kā akelā chhoḌ jaatā hai

sanbhal kar rah mein chalna wahi patthar sikhata hai

hamare panw ke aage jo Thokar ban ke aata hai

nahin diwar ke zaKHmon ka kuchh ehsas insan ko

jo kilen gaDne ke ba'd taswiren lagata hai

main jaise wachanalaya mein rakha aKHbar hun koi

jo paDhta hai wo be-tartib aksar chhoD jata hai

musawwir pyas ki had se guzarta hai koi jab bhi

tabhi taswir kaghaz par samundar ki banata hai

ye sach hai siDhiyan shohrat ki chaDh jaane ke ba'd insan

sahaara dene wale hi ko aksar bhul jata hai

na aise shaKHs ko chaukhaT se KHali hath lauTao

jo ek roTi ke badle sau du'aen de ke jata hai

bahut mushkil hai 'naz' ehsan ka badla chuka pana

diye ko KHud dhuan us ka akela chhoD jata hai