sanbhal sanbhal ke uThate hue qadam donon

sañbhal sañbhal ke uThāte hue qadam donoñ

har ūñch-nīch se guzre haiñ saath ham donoñ

nahīñ rahe vo marāsim jo the magar ab tak

rakhe hue haiñ shanāsā.ī kā bharam donoñ

ham un ke paas to vo haiñ hamāre paas magar

uThā rahe haiñ akele akele ġham donoñ

hameñ raqīb se chiḌ hai raqīb ko ham se

ki tere chāhne vaale haiñ ai sanam donoñ

chale to aa.e haiñ us dar se muskurāte hue

tamām 'umr ab āñkheñ raheñgī nam donoñ

'sha'ūr' hosh uḌāne meñ ek jaise haiñ

hamārā jām-e-sifāl aur jām-e-jam donoñ

sanbhal sanbhal ke uThate hue qadam donon

har unch-nich se guzre hain sath hum donon

nahin rahe wo marasim jo the magar ab tak

rakhe hue hain shanasai ka bharam donon

hum un ke pas to wo hain hamare pas magar

uTha rahe hain akele akele gham donon

hamein raqib se chiD hai raqib ko hum se

ki tere chahne wale hain ai sanam donon

chale to aae hain us dar se muskuraate hue

tamam 'umr ab aankhen rahengi nam donon

'sha'ur' hosh uDane mein ek jaise hain

hamara jam-e-sifal aur jam-e-jam donon