سنبھل سنبھل کے اٹھاتے ہوئے قدم دونوں

سنبھل سنبھل کے اٹھاتے ہوئے قدم دونوں

ہر اونچ نیچ سے گزرے ہیں ساتھ ہم دونوں

نہیں رہے وہ مراسم ۔۔۔جو تھے مگر اب تک

رکھے ہوئے ہیں شناسائی کا بھرم دونوں

ہم ان کے پاس تو وہ ہیں ہمارے پاس مگر

اٹھا رہے ہیں اکیلے اکیلے غم دونوں

ہمیں رقیب سے چڑ ہے رقیب کو ہم سے

کہ تیرے چاہنے والے ہیں اے صنم دونوں

چلے تو آئے ہیں اس در سے مسکراتے ہوئے

تمام عمر اب آنکھیں رہیں گی نم دونوں

شعورؔ ہوش اڑانے میں ایک جیسے ہیں

ہمارا جام سفال اور جام جم دونوں