sang-dil hun is qadar aankhen bhigo sakta nahin

sañg-dil huuñ is qadar āñkheñ bhigo saktā nahīñ

maiñ ki pathrīlī zamīñ meñ phuul bo saktā nahīñ

lag chuke haiñ dāmanoñ par jitne rusvā.ī ke daaġh

in ko aañsū kyā samundar tak bhī dho saktā nahīñ

ek do dukh hoñ to phir un se karūñ jī-bhar ke pyaar

sab ko siine se lagā luuñ ye to ho saktā nahīñ

terī barbādī pe ab aañsū bahā.ūñ kis liye

maiñ to ḳhud apnī tabāhī par bhī ro saktā nahīñ

jis ne samjhā ho hamesha dostī ko kārobār

dosto vo to kisī kā dost ho saktā nahīñ

ḳhvāhishoñ kī nazr kar duuñ kis liye anmol ashk

kachche dhāgoñ meñ koī motī piro saktā nahīñ

maiñ tire dar kā bhikārī tū mire dar kā faqīr

aadmī is daur meñ ḳhuddār ho saktā nahīñ

mujh ko itnā bhī nahīñ hai surḳh-rū hone kā shauq

be-sabab taaza lahū kī fasl bo saktā nahīñ

yaad ke sho.aloñ pe jaltā hai agar merā badan

oḌh kar phūloñ kī chādar tū bhī so saktā nahīñ

haath jis se kuchh na aa.e us kī ḳhvāhish kyuuñ karūñ

duudh kī mānind maiñ paanī bilo saktā nahīñ

sang-dil hun is qadar aankhen bhigo sakta nahin

main ki pathrili zamin mein phul bo sakta nahin

lag chuke hain damanon par jitne ruswai ke dagh

in ko aansu kya samundar tak bhi dho sakta nahin

ek do dukh hon to phir un se karun ji-bhar ke pyar

sab ko sine se laga lun ye to ho sakta nahin

teri barbaadi pe ab aansu bahaun kis liye

main to KHud apni tabahi par bhi ro sakta nahin

jis ne samjha ho hamesha dosti ko karobar

dosto wo to kisi ka dost ho sakta nahin

KHwahishon ki nazr kar dun kis liye anmol ashk

kachche dhagon mein koi moti piro sakta nahin

main tere dar ka bhikari tu mere dar ka faqir

aadmi is daur mein KHuddar ho sakta nahin

mujh ko itna bhi nahin hai surKH-ru hone ka shauq

be-sabab taza lahu ki fasl bo sakta nahin

yaad ke shoalon pe jalta hai agar mera badan

oDh kar phulon ki chadar tu bhi so sakta nahin

hath jis se kuchh na aae us ki KHwahish kyun karun

dudh ki manind main pani bilo sakta nahin