سنگینیٔ حالات سے اب ڈرنے لگا ہوں

سنگینیٔ حالات سے اب ڈرنے لگا ہوں

بے بات سی ہر بات سے اب ڈرنے لگا ہوں

مجھ بندۂ ناچیز پہ اتنا بھی کرم کیا

ہر دم کی مدارات سے اب ڈرنے لگا ہوں

انجانے میں پھر تازہ کوئی گل نہ کھلا دے

بہکے ہوئے جذبات سے اب ڈرنے لگا ہوں

کیا جانے یہ کس شکل میں کب سامنے آ جائیں

دنیا کی عنایات سے اب ڈرنے لگا ہوں

اللہ رے یہ کشمکش زیست کا عالم

خود اپنے خیالات سے اب ڈرنے لگا ہوں

یہ علم کی افراطی ہے یا عقل کا فقدان

بچوں کے سوالات سے اب ڈرنے لگا ہوں

اس کھیل میں محفوظؔ یہ آنکھیں نہ چلی جائیں

میں جلووں کی بہتات سے اب ڈرنے لگا ہوں