سنکٹ میں ہے جان تمہاری بستی میں

سنکٹ میں ہے جان تمہاری بستی میں

قاتل ہے دربان تمہاری بستی میں

گھٹ گھٹ کر جینا پڑتا ہے لوگوں کو

مرنا ہے آسان تمہاری بستی میں

چوبیسوں گھنٹے چوکنے رہتے ہیں

دیواروں کے کان تمہاری بستی میں

میخانے میں بھیڑ ہمیشہ رہتی ہے

دیول ہیں سنسان تمہاری بستی میں

پاس پڑوسی بھی اک دوجے سے اکثر

رہتے ہیں انجان تمہاری بستی میں

سچائی کی پوچھ پرکھ کم ہوتی ہے

بکتا ہے ایمان تمہاری بستی میں

چنتا میں ہر شخص دکھائی دیتا ہے

غائب ہے مسکان تمہاری بستی میں

لفاظوں کو دیکھ ادب کی محفل میں

شاعر ہیں حیران تمہاری بستی میں

ٹھوکی جاتی ہے تالی متھیا نورنگؔ

ہوتا ہے گنگان تمہاری بستی میں