sannaTe ka aalam qabr mein hai hai KHwab-e-adam aaram nahin

sannāTe kā aalam qabr meñ hai hai ḳhvāb-e-adam ārām nahīñ

imkān-e-numūd-e-sub.h nahīñ ummīd-e-charāġh-e-shām nahīñ

dil naame ke shak le purze kiyā ai vaa.e nasībe kā ye likhā

peshānī par un kī mohr nahīñ sar-nāme pe merā naam nahīñ

jaate haiñ jo ujḌe zinda chaman is bāġh-e-jahāñ kī vaj.h ye hai

gulzār ye jis gulfām kā hai us baaġh meñ vo gulfām nahīñ

bichh jā.eñge bulbul aa ke hazāroñ TuuT paḌeñge ja.al ye hai

sayyād gulābī pahne hai kapḌe chādar-e-gul hai daam nahīñ

is najd meñ ḳhauf ai lailā na kar us ġham-zada kī le jā ke ḳhabar

majnūñ se tirā vahshī hai tirā be-chāra koī zirġhām nahīñ

āgāh kiyā hai dil ko hamāre kis ne tumhārī ḳhūbiyoñ se

insāf karo munsif ho tumhīñ phir kyā hai jo ye ilhām nahīñ

dil dete hī un ko ghulne lage nazroñ meñ ajal ke tulne lage

āġhāz-e-mohabbat se ye khulā chāhat kā ba-ḳhair anjām nahīñ

aalam hai ajab gītī-e-adam kā chaar taraf hai ālam-e-hū

āsā.ish-e-jān-o-rūh nahīñ rāhat kā koī hañgām nahīñ

jaanā hai adam kī raah hameñ honā hai fanā-fillāh hameñ

lete haiñ yahāñ dam chand nafas hastī se hameñ kuchh kaam nahīñ

phir aañkh kabhī khulne kī nahīñ niiñd aa.egī ik din aisī hameñ

honā hai yahī soche haiñ jo ham ye ḳhvāb-o-ḳhayāl-e-ḳhām nahīñ

chaurañg nahīñ kyuuñ khelte ab kis kushte pe rahm aayā hai tumheñ

ḳhūñ-reziyoñ kā kyuuñ shauq nahīñ kyuuñ zeb-e-kamar samsām nahīñ

aqlīm-e-ḳhamoshāñ se to sadā ik ġham-zada aatī hai ye sadā

haiñ saikḌoñ shāhanshāh yahāñ par hukm nahīñ ahkām nahīñ

duniyā meñ jo thā taabe thā jahāñ ma.alūm nahīñ pahuñchā vo kahāñ

ibrat kā mahal kahte haiñ ise ab gor meñ bhī bahrām nahīñ

bulbul kī fuġhāñ par ḳhanda-zanī ġhunchoñ ne jo kī pazhmurda hue

sach hai ki hazīn-o-ġham-zada ho hañsne kā ba-ḳhair anjām nahīñ

dīdār ke bhūke tere jo haiñ hai ḳhatm unhīñ par nafs-kushī

kuchh ḳhvāhish-o-fikr-e-faut nahīñ duniyā ke maze se kaam nahīñ

tum qabr meñ kyuuñ uTh baiThe 'sharaf' ārām karo ārām karo

yārān-e-vatan rote haiñ tumheñ kuchh hashr nahīñ kohrām nahīñ

sannaTe ka aalam qabr mein hai hai KHwab-e-adam aaram nahin

imkan-e-numud-e-subh nahin ummid-e-charagh-e-sham nahin

dil name ke shak le purze kiya ai wae nasibe ka ye likha

peshani par un ki mohr nahin sar-name pe mera nam nahin

jate hain jo ujDe zinda chaman is bagh-e-jahan ki wajh ye hai

gulzar ye jis gulfam ka hai us bagh mein wo gulfam nahin

bichh jaenge bulbul aa ke hazaron TuT paDenge jal ye hai

sayyaad gulabi pahne hai kapDe chadar-e-gul hai dam nahin

is najd mein KHauf ai laila na kar us gham-zada ki le ja ke KHabar

majnun se tera wahshi hai tera be-chaara koi zirgham nahin

aagah kiya hai dil ko hamare kis ne tumhaari KHubiyon se

insaf karo munsif ho tumhin phir kya hai jo ye ilham nahin

dil dete hi un ko ghulne lage nazron mein ajal ke tulne lage

aaghaz-e-mohabbat se ye khula chahat ka ba-KHair anjam nahin

aalam hai ajab giti-e-adam ka chaar taraf hai aalam-e-hu

aasaish-e-jaan-o-ruh nahin rahat ka koi hangam nahin

jaana hai adam ki rah hamein hona hai fana-fillah hamein

lete hain yahan dam chand nafas hasti se hamein kuchh kaam nahin

phir aankh kabhi khulne ki nahin nind aaegi ek din aisi hamein

hona hai yahi soche hain jo hum ye KHwab-o-KHayal-e-KHam nahin

chaurang nahin kyun khelte ab kis kushte pe rahm aaya hai tumhein

KHun-reziyon ka kyun shauq nahin kyun zeb-e-kamar samsam nahin

aqlim-e-KHamoshan se to sada ek gham-zada aati hai ye sada

hain saikDon shahanshah yahan par hukm nahin ahkaam nahin

duniya mein jo tha tabe tha jahan malum nahin pahuncha wo kahan

ibrat ka mahal kahte hain ise ab gor mein bhi bahram nahin

bulbul ki fughan par KHanda-zani ghunchon ne jo ki pazhmurda hue

sach hai ki hazin-o-gham-zada ho hansne ka ba-KHair anjam nahin

didar ke bhuke tere jo hain hai KHatm unhin par nafs-kushi

kuchh KHwahish-o-fikr-e-faut nahin duniya ke maze se kaam nahin

tum qabr mein kyun uTh baiThe 'sharaf' aaram karo aaram karo

yaran-e-watan rote hain tumhein kuchh hashr nahin kohram nahin