sapedi rang-e-jahan mein nahin milata hun

sapedī rañg-e-jahāñ meñ nahīñ milātā huuñ

haqīqatoñ ko gumāñ meñ nahīñ milātā huuñ

sarishk-e-ġham rag-e-jāñ meñ nahīñ milātā huuñ

maiñ zahr āb-e-ravāñ meñ nahīñ milātā huuñ

jo kah diyā ki tirā huuñ to sirf terā huuñ

maiñ jhuuT apne bayāñ meñ nahīñ milātā huuñ

tamām-shahr tirī haañ meñ haañ milātā hai

akelā maiñ tirī haañ meñ nahīñ milātā huuñ

tumhārā ġham ġham-e-duniyā se duur rakkhā hai

kabhī maiñ suud ziyāñ meñ nahīñ milātā huuñ

guzar gayā jo tirī yaad ke baġhair kabhī

vo pal maiñ umr-e-ravāñ meñ nahīñ milātā huuñ

sañvārtā huuñ use raat jaag kar 'arshad'

maiñ ḳhvāb ḳhvāb-e-girāñ meñ nahīñ milātā huuñ

sapedi rang-e-jahan mein nahin milata hun

haqiqaton ko guman mein nahin milata hun

sarishk-e-gham rag-e-jaan mein nahin milata hun

main zahr aab-e-rawan mein nahin milata hun

jo kah diya ki tera hun to sirf tera hun

main jhuT apne bayan mein nahin milata hun

tamam-shahr teri han mein han milata hai

akela main teri han mein nahin milata hun

tumhaara gham gham-e-duniya se dur rakkha hai

kabhi main sud ziyan mein nahin milata hun

guzar gaya jo teri yaad ke baghair kabhi

wo pal main umr-e-rawan mein nahin milata hun

sanwarta hun use raat jag kar 'arshad'

main KHwab KHwab-e-giran mein nahin milata hun