sar apne ko tujh par fida kar chuke hum

sar apne ko tujh par fidā kar chuke ham

haq-e-āshnā.ī adā kar chuke ham

tū samjhe na samjhe hameñ saath tere

jo karnī thī ai bevafā kar chuke ham

ḳhudā se nahīñ kaam ab ham ko yaaro

ki ik but ko apnā ḳhudā kar chuke ham

maiñ pūchhā mirā kaam kis din karoge

to yuuñ muñh phirā kar kahā kar chuke ham

ghuras le tū ab un ko chīre meñ apne

tamāshā-e-zulf-e-dotā kar chuke ham

tū jaave na jaave jo karnī thī ham ko

samājat tirī ai sabā kar chuke ham

na boleñge pyāre tirī hī suneñge

tū dushnām de ab duā kar chuke ham

kabhū kaam apnā kisī se na niklā

bahut ḳhalq kī iltijā kar chuke ham

laḌī 'mus.hafī' aañkh jis se ki apnī

par āḳhir use āshnā kar chuke ham

sar apne ko tujh par fida kar chuke hum

haq-e-ashnai ada kar chuke hum

tu samjhe na samjhe hamein sath tere

jo karni thi ai bewafa kar chuke hum

KHuda se nahin kaam ab hum ko yaro

ki ek but ko apna KHuda kar chuke hum

main puchha mera kaam kis din karoge

to yun munh phira kar kaha kar chuke hum

ghuras le tu ab un ko chire mein apne

tamasha-e-zulf-e-dota kar chuke hum

tu jawe na jawe jo karni thi hum ko

samajat teri ai saba kar chuke hum

na bolenge pyare teri hi sunenge

tu dushnam de ab dua kar chuke hum

kabhu kaam apna kisi se na nikla

bahut KHalq ki iltija kar chuke hum

laDi 'mushafi' aankh jis se ki apni

par aaKHir use aashna kar chuke hum