سر بکف چلنا پڑا ہے قاتلوں کے شہر میں

سر بکف چلنا پڑا ہے قاتلوں کے شہر میں

دل کی قیمت کچھ نہ تھی ان بے حسوں کے شہر میں

ہوشمندی کا لبادہ اوڑھ کر آیا تھا میں

اور پاگل ہو گیا ہوں پاگلوں کے شہر میں

سر چھپانے کے لئے اک سائباں تو چاہئے

بھیگتے کب تک رہو گے بارشوں کے شہر میں

سچ کی قیمت کچھ نہیں ہے جھوٹ کے بازار میں

عقل کی وقعت کہاں ہے سرپھروں کے شہر میں

کوئی بھی در وا نہیں ہوتا یہاں میرے لیے

مل نہ پائیں گی پناہیں بزدلوں کے شہر میں

مجھ کو بھی مہنگی بڑی ہے ان گلی کوچوں کی سیر

دل گنوا آیا ہوں میں بھی گل رخوں کے شہر میں

بیٹھ مت جانا کبھی فاروقؔ تم جی ہار کے

ڈھونڈھنا ہے حل کوئی اس مشکلوں کے شہر میں