sar-ba-kaf chalna paDa hai qatilon ke shahr mein

sar-ba-kaf chalnā paḌā hai qātiloñ ke shahr meñ

dil kī qīmat kuchh na thī in be-hisoñ ke shahr meñ

hosh-mandī kā labāda oḌh kar aaya thā maiñ

aur pāgal ho gayā huuñ pāgaloñ ke shahr meñ

sar chhupāne ke liye ik sā.ebāñ to chāhiye

bhīgte kab tak rahoge bārishoñ ke shahr meñ

sach kī qīmat kuchh nahīñ hai jhuuT ke bāzār meñ

aql kī vaq.at kahāñ hai sar-phiroñ ke shahr meñ

koī bhī dar vā nahīñ hotā yahāñ mere liye

mil na pā.eñgī panāheñ buz-diloñ ke shahr meñ

mujh ko bhī mahñgī baḌī hai in galī kūchoñ kī sair

dil gañvā aaya huuñ maiñ bhī gul-ruḳhoñ ke shahr meñ

baiTh mat jaanā kabhī 'fārūq' tum jī haar ke

DhūñDhnā hai hal koī is mushkiloñ ke shahr meñ

sar-ba-kaf chalna paDa hai qatilon ke shahr mein

dil ki qimat kuchh na thi in be-hison ke shahr mein

hosh-mandi ka labaada oDh kar aaya tha main

aur pagal ho gaya hun pagalon ke shahr mein

sar chhupane ke liye ek saeban to chahiye

bhigte kab tak rahoge barishon ke shahr mein

sach ki qimat kuchh nahin hai jhuT ke bazar mein

aql ki waqat kahan hai sar-phiron ke shahr mein

koi bhi dar wa nahin hota yahan mere liye

mil na paengi panahen buz-dilon ke shahr mein

mujh ko bhi mahngi baDi hai in gali kuchon ki sair

dil ganwa aaya hun main bhi gul-ruKHon ke shahr mein

baiTh mat jaana kabhi 'faruq' tum ji haar ke

DhunDhna hai hal koi is mushkilon ke shahr mein