sar denge alam sar-nigun hum hone na denge

sar deñge alam sar-nigūñ ham hone na deñge

miT jā.eñge tauhīn-e-haram hone na deñge

vo din ga.e jhuk jaate the ham aap ke aage

ab to sar-e-taslīm bhī ḳham hone na deñge

ye hasrat-e-dīdār nikal jaa.e na jab tak

ai zauq-e-nazāra tujhe kam hone na deñge

ham nazm-e-gulistāñ ko badal deñge sitamgar

phūloñ pe havāoñ ke sitam hone na deñge

vo husn pe maġhrūr haiñ hote raheñ lekin

ham ishq ko mohtāj-e-karam hone na deñge

vo bhī nazar aate haiñ sitamgāroñ meñ 'maḳhfī'

jo kahte the ham zulm-o-sitam hone na deñge

sar denge alam sar-nigun hum hone na denge

miT jaenge tauhin-e-haram hone na denge

wo din gae jhuk jate the hum aap ke aage

ab to sar-e-taslim bhi KHam hone na denge

ye hasrat-e-didar nikal jae na jab tak

ai zauq-e-nazara tujhe kam hone na denge

hum nazm-e-gulistan ko badal denge sitamgar

phulon pe hawaon ke sitam hone na denge

wo husn pe maghrur hain hote rahen lekin

hum ishq ko mohtaj-e-karam hone na denge

wo bhi nazar aate hain sitamgaron mein 'maKHfi'

jo kahte the hum zulm-o-sitam hone na denge